មន្រ្តីជាន់ខ្ពស់ក្រសួងអភិវឌ្ឍន៍ជនបទ បានបង្ហាញពីការព្រួយបារម្ភ ចំពោះផែនការរបស់រាជរដ្ឋាភិបាល ដែលបានកំណត់យកឆ្នាំ២០២៥ ជាឆ្នាំដែលប្រជាពលរដ្ឋនៅតាមជនបទទូទៅ ទទួលបានការប្រើប្រាស់ទឹកស្អាត និងអនាម័យជនបទ ថាមិនអាចសម្រេចទៅតាមការកំណត់នេះ ដោយសារតែបញ្ហាកូវីដ១៩ឆ្លងជាសកល និងការបម្រែបម្រួលអាកាសធាតុ។
ថ្លែងនៅក្នុងឱកាសអញ្ជើញជាអធិបតីក្នុងពិធីបិទកម្មវិធី អង្គវិបស្សនា រៀបចចំដោយក្រុមការងារផ្គត់ផ្គង់ទឹក ការសម្អាត និងអនាម័យជនបទនៅខេត្តតាកែវ ដែលមានរយៈពេល២ថ្ងៃ នៅសណ្ឋាគារអាសីលវិឡា ក្នុងក្រុងដូនកែវ ឯកឧត្តមបណ្ឌិត នួន ដាញ៉ិល រដ្ឋលេខាធិការក្រសួងអភិវឌ្ឍន៍ជនបទ បានមានប្រសាសន៍ថា ការផ្គត់ផ្គង់ទឹកស្អាត និងអនាម័យជនបទ ដែលត្រូវសម្រេចនូវទស្សនវិស័យនៃគោលនយោបាយរបស់រាជរដ្ឋាភិបាល ស្តីការផ្គត់ផ្គង់ទឹកស្អាត និងការលើកកម្ពស់អនាម័យជនបទ ពីឆ្នាំ ២០១៤-២០២៥ វានៅតែជួបបញ្ហាប្រឈមមួយចំនួន ក្នុងនោះគឺបណ្តាលមកពីជំងឺឆ្លងកូវីដ១៩ ដែលកំពុងវាយលុកខ្លាំងនៅទូទាំងពិភពលោក ព្រមទាំងបញ្ហាបម្រែបម្រួលអាកាសធាតុ ដែលចំនុចទាំងនេះវាសុទ្ធសឹងតែជាផលអវិជ្ជមាន ដែលយើងនឹកស្មានមិនដល់ ហើយជះឥទ្ធិពលខ្លាំងលើទស្សនវិស័យដែលបានកំណត់ ដូច្នេះដើម្បីឈានទៅរកការសម្រេចនូវគោលបំណងធ្វើឱ្យប្រជាជននៅតាមតំបន់ជនបទ ទទួលបានសេវាផ្គត់ផ្គង់ទឹកស្អាត និងអនាម័យ ១០០ភាគរយ នៅឆ្នាំ២០២៥ ខាងមុខនេះ វាតម្រូវឱ្យក្រុមការងារផ្គត់ផ្គង់ទឹកស្អាត និងអនាម័យជនបទ ត្រូវបង្កើនការអនុវត្តការងារលើទស្សនវិស័យនេះទ្វេដង ពិសេសសមាជិក សមាជិកានៃក្រុមការងារផ្គត់ផ្គង់ទឹកស្អាត និងអនាម័យ ក៏ដូចជាអង្គការដៃគូដែលបាន និងកំពុងសហការទាំងអស់ ត្រូវខិតខំបន្ថែមទៀត ខណៈដែលគម្រោងរបស់យើងសម្រេចបានជិតដល់គោលដៅហើយ។
ឯកឧត្តមបណ្ឌិតរដ្ឋលេខាធិការ បានបន្តថា បញ្ហាផ្គត់ផ្គង់ទឹកស្អាត និងអនាម័យជនបទនេះ គឺជាការចាំបាច់សម្រាប់ប្រទេសកម្ពុជា ក្នុងការសម្រេចឱ្យបានជោគជ័យឱ្យខានតែបាន សម្រាប់តំបន់ជនបទដាច់ស្រយាល ដែលពុំទាន់មានទឹកស្អាតប្រើប្រាស់ និងអនាម័យជនបទគ្រប់គ្រាន់ ហើយលទ្ធផលនៃវឌ្ឍនភាពជាវិជ្ជមាននៃអនាម័យ និងការប្រើប្រាស់ទឹកស្អាត គឺកើតឡើងដោយសារការខិតខំប្រឹងប្រែងផ្ទាល់របស់រាជរដ្ឋាភិបាល គួបផ្សំនឹងការចូលរួមសហការយ៉ាងជិតស្និទ្ធរវាងរាជរដ្ឋាភិបាល ជាមួយដៃគូអភិវឌ្ឍ ក៏ដូចជាផ្នែកពាក់ព័ន្ធផ្សេងៗ រួមទាំងវិស័យឯកជនផងដែរ។
ជាមួយគ្នានេះដែរ ឯកឧត្តមបណ្ឌិត នួន ដាញ៉ិល រំពឹងទុកថា ក្រោយពីបានជួបជុំពិភាក្សា និងរៀនសូត្រផ្លាស់ប្តូរបទពិសោធ៍ពីគ្នាទៅវិញទៅមក ក្រុមការងារទាំងអស់នឹងកាន់តែមានការយល់ដឹងច្បាស់ លើការងារដែលកំពុងអនុវត្តបន្ថែមទៀត និងកាន់តែមានភាពល្អប្រសើរឡើងក្នុងការផ្លាស់ប្តូរឥរិយាបទបងប្អូនប្រជាពលរដ្ឋ នៅតាមទីជនបទ បានយល់ដឹងពីផលប៉ះពាល់ដោយសារកង្វះអនាម័យ និងមិនបានបរិភោគទឹកស្អាតជាប្រចាំ ឱ្យងាកមកទទួលទានទឹកស្អាត និងប្រើប្រាស់បង្គន់អនាម័យបានគ្រប់ខ្នងផ្ទះ៕
