នៅព្រលប់ថ្ងៃទី១៦ ខែវិច្ឆិកា ឆ្នាំ២០២០នេះ លោក ផែង វណ្ណៈ បានសរសេរបង្ហោះនៅបណ្ដាញសង្គម ដោយបានដាក់ចំណងជើងថា៖ ជូនម្ចាស់លេខទូរស័ព្ទ ០៧៨ ៤០៤០២៤ តំណាងម្ចាស់រថយន្ត លេខ 2BJ-2235 មេត្តាជ្រាប ៖ ថ្ងៃនេះខ្ញុំបានទទួល ព័ត៌មានពី ជនរងគ្រោះមកថា មានលេខទូរស័ព្ទ ០៧៨ ៤០ ៤០ ២៤ បានទូរស័ព្ទមកគាត់ដោយអះអាងថា ខ្លួនជាតំណាងម្ចាស់រថយន្ត Ford Pick Up ស្លាកលេខ 2BJ-2235 ភ្នំពេញ ដោយបានប្រាប់គ្រួសារជនរងគ្រោះថា រឿងគ្រោះថ្នាក់ចរាចរណ៍នេះ មិនបាច់ទៅដោះស្រាយដល់ស្រុកទេ ដោះស្រាយត្រឹមឃុំបានហើយ យកស្លាកលេខឡានមកអោយគេ គេបង់លុយ ១លានរៀល អោយទៅមើលជំងឺ ដើម្បី បញ្ចប់រឿង ។ ម្ចាស់ទូរស័ព្ទនោះបានព្រមានគ្រួសារជនរងគ្រោះថា បើមិនយកលុយ ១លាន ដើម្បីបញ្ចប់រឿងទេ គេសុខចិត្តយកលុយទៅតំកល់នៅ តុលាការចោល ហើយមិនសងទេ ចង់ប្ដឹងយ៉ាងម៉េចក៏ប្ដឹងទៅ ។
ខ្ញុំគ្រាន់តែលឺគ្រួសារជនរងគ្រោះ ផ្ដល់ព័ត៌មានបែបនេះមកក្ដៅឆេវតែម្ដង ។ ខ្ញុំសូមប្រាប់ទៅ ម្ចាស់លេខទូរស័ព្ទ ដែលជាតំណាង ម្ចាស់រថយន្តថា ខ្ញុំសុំបុកម៉ែលោកឯង និង ប្រពន្ធលោកឯងកំពុងពោះធំជិតគ្រប់ខែ ហើយខ្ញុំសង ១០ លានរៀល លោកឯងយកអត់ ? ម៉េច លោកឯងអាងមានលុយចង់មើលងាយអ្នកក្រឬ ? ខ្ញុំសូមផ្ដាំលោកថា លោកមិនអាចគេចផុតពីសំណាញ់ច្បាប់ទេ សូមកុំព្រហើន ។ បើលោកមិនដោះស្រាយសំណងសងដល់ជនរងគ្រោះបានសមរម្យទេ ខ្ញុំនឹងស្នេីសុំនគរបាល ដកហូតយករថយន្តទៅរក្សាទុកនៅស្នងការដ្ឋាននគរបាលខេត្តកំពត ដើម្បីកសាងសំណុំរឿងបញ្ជូនទៅតុលាការ ។ ខ្ញុំមិនអោយលោកឯងមេីលងាយប្រជាពលរដ្ឋក្រីក្របាជាដាច់ខាត ។
ទៅដល់ណាក៏ខ្ញុំទៅដល់ដែរ ខ្ញុំនឹងតាមដានករណីនេះរហូតដល់ជនរងគ្រោះទទួលបានយុត្តិធម៌ពិតប្រាកដ ។
