អគ្គនាយក TVFB លោក សុវណ្ណ រិទ្ធី ត្រូវសមត្ថកិច្ចចាប់ខ្លួន ក្រោមបទល្មើស ញុះញង់ឲ្យប្រព្រឹត្តបទល្មើសជាទិ៍ តាមមាត្រា ៤៩៥
ពិសី
Wednesday, April 08, 2020
ភ្នំពេញ៖ បើយោងតាមការបញ្ជាក់ពី លោក ឆាយ គឹមឃឿន អ្នកនាំពាក្យអគ្គស្នងការដ្ឋាននគរបាលជាតិ នៅថ្ងៃទី០៨ ខែមេសា ឆ្នាំ២០២០នេះ ពិតជាមានករណីចាប់ខ្លួន លោក សុវណ្ណ រិទ្ធី ចាងហ្វាងការផ្សាយ TVFB ពិតប្រាកដមែន កាលពីយប់ថ្ងៃទី០៧ ខែមេសា ឆ្នាំ២០២០ ពី បទល្មើសញុះញង់ឲ្យប្រព្រឹត្តបទល្មើសជាអាទិ៍ តាមមាត្រ ៤៩៥ ពាក់ព័ន្ធនឹងការសរសេរលើហ្វេសប៊ុកដោយស្រង់ពាក្យសម្តីសម្ដេច ហ៊ុន សែន ដែលបាននិយាយថា «បើអ្នករត់ម៉ូតូឌុបក្ស័យធន លក់ម៉ូតូចាយសិនទៅ រដ្ឋាភិបាលគ្មានលទ្ធភាពជួយនោះទេ»។អ្នកនាំពាក្យអគ្គស្នងការនគរបាលជាតិ បានបន្តថា សំណេររបស់លោក សុវណ្ណ រិទ្ធី នេះ ជាការបំប៉ោង និងបំពុលសង្គម ដែលធ្វើឱ្យពលរដ្ឋយល់ច្រឡំលើសម្ដេច ហ៊ុន សែន។ លោក គឹមឃឿន ចាត់ទុកសំណេររបស់ចាងហ្វាង TVFB រូបនេះ ជាចេតនាបង្កើតឱ្យមានចលាចលក្នុងសង្គម។ «សម្ដេច ហ៊ុន សែន គាត់បានចេញវិធានការដោះស្រាយបញ្ហាពលរដ្ឋដែលជួប្រឈមនឹងជំងឺ កូវីដ១៩ ហើយ ហើយគ្រាន់តែសម្ដេចនិយាយលេងមួយម៉ាត់ ពីរម៉ាត់សោះ បែរជាយកមកចុះផ្សាយ។ សម្ដេចគាត់គ្មានចេតនាដូចការចុះផ្សាយឯណា ព្រោះគាត់បានចេញវិធានការច្រើនមកហើយ»។
បន្ទាប់ពីមានករណីចាប់ខ្លួននេះ សមាជិកគ្រួសារលោក សុវណ្ណ រិទ្ធី បានស្នើឱ្យថ្នាក់ដឹកនាំនិងសមត្ថកិច្ច យោគយល់និងអាធ្យាស្រ័យចំពោះលោក រិទ្ធី ។ «ទាក់ទងនឹងការសរសេរខុសឆ្គងនេះ គាត់គ្មានចេតនាទេ គាត់ក៏អត់ចង់សរសេរប៉ះពាល់ថ្នាក់ដឹកនាំទេ»។ សមត្ថកិច្ចបានបញ្ជូនលោក សុវណ្ណ រិទ្ធី ចាងហ្វាង TVFB មកស្នងការនគរបាលរាជធានីភ្នំពេញ អ្នកនាំពាក្យអគ្គស្នងការដ្ឋាននគរបាលជាតិលោក ឆាយ គឹមឃឿន បាននិយាយថា បើសិនជាសមត្ថកិច្ចពិនិត្យឃើញថា ជាករណីធ្ងន់ធ្ងរនោះ សមត្ថកិច្ចនឹងធ្វើបែបបទកសាងសំណុំលោក សុវណ្ណ រិទ្ធី បញ្ជូនទៅតុលាការ ។ ប៉ុន្តែបើសិនជាករណីអចេតនានោះ សមត្ថកិច្ចគ្រាន់តែធ្វើការអប់រំ និងណែនាំប៉ុណ្ណោះ៕ប្រភព៖ ថ្មីៗ
