បន្ទាប់ពីប្រទេសមួយចំនួនបដិសេធការចូលចត ដោយសារមូលហេតុខ្លាចមានអ្នកដំណើរមានផ្ទុកមេរោគកូរ៉ូណា ទោះបីខាងនាវាអះអាងថា គ្មានអ្នកឈឺក៏ដោយ។ នាវាដែលមានផ្ទុកមនុស្សប្រមាណ១៤៥០នាក់ និងក្រុមនាវិក៨០០នាក់នេះនឹងមកដល់កំពង់ផែព្រះសីហនុ នៅម៉ោង ០៧០០នាទីព្រឹក ថ្ងៃព្រហស្បតិ៍ទី១៣ ខែកុម្ភៈ។
ភ្ញៀវទេសចរណ៍ក្នុងនាវានេះ នឹងអាចផ្ទេរការធ្វើដំណើរតាមយន្តហោះនៅកម្ពុជា។ ភ្ញៀវទេសចរណ៍ចម្រុះជាតិសាសន៍ទាំងអស់ ដែលក្នុងនោះ មានជនជាតិអាមេរិក៦៥០នាក់ផងដែរ បានថ្លែងអំណរគុណយ៉ាងជ្រាលជ្រៅចំពោះអាជ្ញាធរកម្ពុជា ដែលបានផ្ដល់ការគាំទ្រពួកគេក្នុងការចូលចតនៅកម្ពុជា ខណៈដែលពួកគេកំពុងខ្វះស្បៀងអាហារ និងត្រូវចាក់ប្រេងផងដែរនោះ។
សម្តេចតេជោ ហ៊ុន សែន បានមានប្រសាសន៍ឆ្លើយតបថា «ហេតុអ្វីត្រូវសម្រេចអនុញ្ញាតឲ្យនាវានេះចូលចត តើត្រូវឲ្យពួកគេទៅណា បើគេបានបិទអស់ហើយ, ដូចដែលខ្ញុំបាននិយាយហើយថា ជំងឺពិតប្រាកដគឺភាពភ័យខ្លាច មិនមែនជាជំងឺកូរ៉ូណានោះទេ។ការអនុញ្ញតឲ្យចូលនេះបង្ហាញពីការលុបបំបាត់នូវជំងឺភ័យខ្លាច ដែលកំពុងកើតមាននៅលើពិភពលោកយើងនេះ ហើយកម្ពុជាគ្មានឡើយការរើសអើងពូជសាសន៍ ត្រូវតែចូលរួមសង្រ្គោះក្នុងកិច្ចការមនុស្សធម៌ ខណៈពួកគេកំពុងជួបគ្រោះអាសន្ន»។ទោះបីជាតិសាសន៍ណាក៏ដោយ កិច្ចការនេះបង្ហាញពីការងារ មនុស្សធម៌ដ៏ប្រពៃ និងសណ្តានចិត្តរបស់កម្ពុជាសម្រាប់មនុស្សលើពិភពលោក ក្នុងការយកអាសារសម្រាប់ជាតិសាសន៍ដទៃ។
សម្ដេចតេជោ បានបន្តថា បើគេមិនទទួលកម្ពុជាទទួល, កម្ពុជាក៏ចង់បង្ហាញថា កម្ពុជាមិនមែនគ្រាន់តែសហការជាមួយចិននោះទេ គឺធ្វើជាមួយគ្រប់ជាតិសាសន៍ទាំងអស់ ព្រោះបញ្ហានេះវាក្លាយជាបញ្ហាប្រឈម ជាសកលរួចទៅហើយ និងម្យ៉ាងទៀតបញ្ហាមនុស្សធម៌ក៏គ្មានព្រំដែនដែរ។ យើងត្រូវតែជួយពួកគេនៅពេលដែលពួកគេសុំឱ្យយើងជួយ យើងត្រូវតែជួយគេប្រកប ដោយស្មារតីទទួលខុសត្រូវ», នេះជាប្រសាសន៍របស់សម្តេចតេជោ ហ៊ុន សែន បញ្ជាក់បន្ថែមយ៉ាងដូច្នេះ៕
